Datorren irailaren 19an, larunbatean, Laudion gauzatuko den Etxeratek iragarritako manifestazioaren harira mintzatu da Jon Ander Altube, Laudioko alkate ordea.
Ekainaren bukaeran iragarri zuten mobilizazioa Etxeratek eta hainbat ordezkari politikok, Carlos Urquijo Gobernadore zibilak udaletxean dagoen sakabanaketaren aurkako ikurraren kontrako salaketa jarri zuenean.
Laudioko Herriko Plazatik arratsaldeko 19:30tan abiatuko da manifestazioa “Elkartasuna ez da delitua”, “Dispertsioarekin amaitu behar da” eta “Etxean nahi ditugu” lelopetan.
Horren guztiaren harira, Altubek Laudioko gobernu taldearen atxikimendua adierazi du manifestazioarekiko.
Altuberen hitzetan, manifestazioak ekainean hasitako kanpainari amaiera ematen dio, zehazki bere garaian Aiara, Urduña, Laudio eta Arrankudiaga-Zolloko alkateen babesa izan zuen kanpainak.
Presoen eskubideen aldarrikapena
Bide batez, Jon Ander Altubek preso politikoen eskubideekiko errespetua exijitu du, Laudioko Udalak azken urtetan “dispertsioaren amaiera” edota “preso gaixoen etxeratzea” bezalako funtsezko gaien alde egin duela berretsiz.
Amaitzeko, irailaren 19an antolatutako manifestazioarekin bat egiteko deialdia luzatu die Jon Ander Altubek herritarrei.