Duela hilabete batzuk hainbat herritarrek lan taldea osatu eta Laudioko jaien egutegiaren inguruan hausnarketa egin zuten. Egindako hausnarketaren ondorioak udal biltzar batean aurkeztu dituzte dagoeneko eta, Jon Ander Altube alkate ordeak azaldu duenez, hurrengo urratsa urritik aurrera hasiko den prozesu parte hartzailea izango da. Prozesu honen bidez erabakiko da Laudioko jaien egutegia dagoen bezala geratzen den edo, hainbatetan proposatu den bezala, aldatu egiten den.
Ahalik eta jende eta sektore gehien biltzeko helburua izango duten jardunaldiak izango dira, profil desberdinetako pertsonen parte hartzea bilatuko dutenak: jaiak, kultura, kirola eta bestelako esparruetan ibili den jendea parte hartuko du. Jardunaldi anitzak eta jendetsuak izatea da Udalaren asmoa.
Lan taldeak eman duen datuetariko bat, herrian jai egutegiaren inguruan askotariko iritziak daudela da. Oso gai irekia eta konplesua dela ondorioztatu dute eta, beraz, erabakia ez da erraza izango.
Dauden aukera eta ikuspuntu desberdinak deskribatzen dituen dokumentua osatuko da abiapuntu moduan, jardunaldietan parte hartzen duten guztiek tresna bat izan ditzaten bere iritzia osatzeko.
Erabaki loteslea
Jon Ander Altubek azaldu duenez, erabakitze prozesua oraindik zehaztua ez dagoen arren, argi dute jaien egutegia ez dela Udalak bere aldetik hartu dezaken erabakia eta beraz, jardunaldi hauetan erabakitzen dena loteslea eta epe luzerako izatea da asmoa.