Euskal Enplegu Zerbitzua den Lanbidek langabeei zuzendutako ikastaroak antolatuko ditu irailetik aurrera. Alde batetik, bost ikastaro ezberdin emango ditu eta bestetik, negozio berria sortu nahi dutenentzako kurtsoa eskainiko du urrian.
Irailetik aurrera Euskal Enplegu Zerbitzuak langabeei zuzendutako beste bost ikastaro eskainiko ditu. Honako hauek izango dira: igotzeko orgatila eta plataforma jasotzaile mugikorren langile operadorearen ikastaroa, zubi-garabia maneiatzeko kurtsoa, makinari izateko ikastaroa eta jendaurrean arreta zerbitzua eskaintzeko, kutxazaina izateko eta produktuak jartzeko langilea izateko kurtsoa. Informazio gehiago lortzeko Tokiko Garapenerako Agentziara bertaratuaz, 94 403 49 80 telefonora deituaz edota garapenagentzia@laudiokoudala.net helbidera idatziaz egin daiteke.
Langabe ekintzaileak
Lanbidek enpresa berri bat sortzeko gakoak emango dituen ikastaroa eskainiko du urriaren 19tik 30era, 9:30etik 13:30era. Kurtsoa negozio bat zabaldu nahi duten langabeei zuzendua dago eta bertan merkatuaren analisia, sare sozialetako marketina, alderdi fiskalak edota analisi ekonomikoa egiten ikasi ahalko da, besteak beste. Izena-emateak Laudioko Lanbideko bulegoetan eta www.lanbide.euskadi.eus web gunean egin daiteke.