Jaietako azken egunean Kofradiak antolatzen duen Anaitasun bazkaria da seguru asko, festetan eztabaida gehien sortu duen ekitaldia. Emakumeen parte hartzean kokatu da eztabaidaren muina. Kofradia sortu zenetik (1599an) 2010ra arte emakumeek galarazita zeukaten bazkari horretan parte hartzea.
2010an, baina, Arartekoarenean jarritako salaketa baten ondorik, euren arteko bozketa egin zuten kofradeek, eta gehiengo zabal bat emakumeak onartzearen alde azaldu zen.
Laudioar orori zabaldua
Kofradiako kideek adierazi dute emakumeen parte hartzearen onartzea “erabat normalizatua” dagoela. “Polemika hori ez da kofradiaren barruan existitzen”, ziurtatu du Kofradiako kidea den Carlos De La Florrek, eta gaineratu du 18 urtetik gorako edozein laudioar izan daitekeela kofrade. “Horretarako San Rokeko ermitara joan behar da, abuztuko lehen igandean, 11:30ean”.
Zentsu horretan, belaunaldi aldaketa bermatua dagoela uste du De La Florrek. “Alde batetik, urtero hainbat herritar berri sartzen direlako, eta bestetik, hainbat gazte datozelako euren senideak ordezkatzera”. Gaur egun 600 kide inguru ditu taldeak.
Kofradiaren jarduna, baina, ez da jaietako bazkari horretara mugatzen. “Urtean zehar hainbat ekintza sozial egiten ditugu”, azaldu du De La Florrek, “herriko ondarearen babesaren alde, batez ere”.