Laudioko Jaiek herriko kaleak zipriztinduko dituzte hurrengo egunetan; bihar Berakatz Eguna ospatuko da, ostegunean Koadrilen Eguna, ostiralean Baserritar Eguna eta larunbatean Odoloste Eguna.
Berakatz Eguna
Bihar kirola -hockey eta voleibola, Ganbegi eta Kultur Arteko Zubiak taldeen eskutik hurrenez gurren-, musika, antzerkia eta umeentzako jokoak egongo dira hainbat lekutan.
Ohiturari jarraituz Untzueta Dantza Taldeak Soka, Aurreskua, Senidetasun Bazkaria eta Dantza plaza egingo du.
Jarduera bitxien artean, Laudioko Gazte Asanbladak Gabarren Jaitsiera antolatuko du.
Koadrilen Eguna
Koadrilek bere ohiko bazkari jendetsua egingo dute Laudioko BHIko jolastokian eta ekintzaz jositako egitarauan txosnetan gauez egingo den kontzertuak jende ugari erakarriko du, Anestesia, Skakeitan eta Izate Faltsua taldeek joko baitute.
Baserritar Eguna
Baserritar Egunean hainbat ekoizlek kale nagusia hartuko dute goizetik. Baina horretaz gain eskaintza kulturala izugarri oparoa izango da; antzerkia, gastronomia, Artzain Txakurren txapelketa Arkaitz Estiballes eta Amets Arzallus bertsolarien emanaldiarekin...
Eta gainera hamaika musika emanaldi. Eskaintza oso anitza izango; folka, funkye, techno, disko festa, berbena camp, hip hop...
Odoloste Eguna
Jaiak ez du etenik izango larunbatean eta musika, kultura, gastronomia, bertsolaritza eta umeentzako hamaika hitzordu badaude ere ekintza herrikoiak nabarmendu behar dira; kulero eta galtzontzilo lasterketa edo pankarten saria.
Txosnagunea
Laudioko Txosna Batzordeak jaien lehenengo txanparen oso balorazio positiboa egin du. Jai eremu berriak oso harrera ona izan duela azaldu du. Hori ez ezik adin guztientzako ekintzak antolatzea oso garrantzitsua izan dela azpimarratu du.
Euskaraz izan direla ekintza gehienak eta tokiko ekoizleekin harremana estutu dutela ere nabarmendu dute.
Jaien bigarren txanpan ere txosnagunera hurbiltzeko gonbidapena luzatu dute Txosna Batzordetik.