Eguerdian hasi dira Laudioko jaiak. Goizeko 10:00etan, baina, Baldarrak jai kuadrilak antolatutako herri gosarian elkartu dira herritarrak festei aurre egiteko indarrak batu asmoz. Ondoren, batukadaren erritmora egin dute kalejira herriko plazara, 11:30ean brindis herrikoia egin eta txupinazoari ekiteko. Txilardiak kuadrila izan da aurtengo txupineroa, eta Andere abesbatzarekin batera igo dira udaletxeko balkoira 11:45etan.
Txupinazoan zabaldutako mezuan jaietan emakumeen presentzia areagotu izana goraipatu dute, bereziki, emakumeentzat ere festa bereziak direla nabarmenduz. Hala, eraso eta jarrera sexisten aurkako protestarekin bat egin dute, herriko plazan 40 bat emakume igo baitira oholtzara beltzez jantzita eta antifaz moreekin azken asteetan jaietan izandako eraso matxistak salatu eta jaiak ere haienak direla aldarrikatzera. Txupinazoan zehar ordezkari politiko ugari egon dira, bai zinegotziak eta baita Laura Garrido ere.
Tradizioari jarraiki kalez kale ur eske aritu ondoren txosnagunean egin du etenaldia San Roke jaietako lehenengo kalejirak. Bertan, txosnagunearen irekiera ekitaldia egin dute, eta "Urrezko katxia" saria banatu diote SOS Lamuza Parkea plataformari. Arratsaldean zehar ski taula, karaokea eta kontzertuak izango dira nagusi.
Argazkiak: Izar Mendiguren, Irati Moreno eta Gartzen Garaio