Batzuek dauden bezala utziko lituzkete. Beste batzuek berriz, egokiena aste bakar batean batzea dela uste dute. Baina badaude baita beste hilabete batera mugitzearen aldekoak, edota bi zatiak batean batzearen aldekoak, edo...
Iritzi asko daude Laudioko Jaien daten inguruan, baina argi dagoena zera da: proposamen bateratu bat falta dela. 2011an inkesta bat egin zuen udalak. 200 pertsona inguruk erantzun zuten galdetegia, eta gehienak jaien datak ez aldatzearen alde azaldu ziren.
Iazko jaien ostean, baina, eztabaidari berriz ekiteko unea zela adierazi zuen udalak, eta bilera bat deitu zuen horretarako. Bilera horretatik lan-talde bat sortu zen. “Jaietan inplikatutako jendea bertaratu gara”, azaldu du lan-taldeko kide den Txema Urkijok, “baina norbanako moduan hartu dugu parte”.
Eztabaidarako txostena
“Lehen momentutik argi genuena zera zen: gure helburua ez zela jaietarako data batzuk aukeratzea, gaiari buruzko eztabaida erraztea baizik”, ziurtatu du Urkijok. Txosten bat prestatu dute horretarako. “Dauden data aukera guztiak zerrendatu eta bakoitzaren puntu positibo eta negatiboak aztertzen ditu”.
Udalari helarazi diote dokumentua, eta proposamen bat luzatu diote: iraila-urria partean eztabaida herrira zabaltzea, prozesu parte hartzaile baten bidez.