Udalak jakinarazi duenez, asteazkenean, hilaren 29an, hasiko dira Aldaikorrekako saneamendua konpondu eta sare nagusiak berrituko dituzten lanak. Fase desberdinetan burutuak izateko programatuta daude.
Lehena irailaren lehenengo egunetara arte luzatzea aurreikusita dute. Tarte horretan Zumalakarregitik parkerako zatia konponduko da. Irailetik aurrera, parkean jarraituko lukete. Hala ere, jakinarazi dutenez, lehenengo fasean ere parkean zenbait lan egin beharko dituzte.
Lanak Zumalakarregi 23 eta 25 zenbakietan hasiko dira, Udal Lanbide Heziketa Eskolako parkingaren inguruan.
Bertan kolektore nagusiarekin lotura aurkitzen da. Ondoren, Instituto ondotik, Viña Vieja kaletik barrena, amaieraraino. Bertan, parkeko estazio meteorologikoaren ondoan bigarren konexio putzua egongo litzateke.
Irailetik aurrera, bertatik abiatuta parke osoa zeharkatu eta Ugarteraino, obraren azkeneko faseari ekingo diote.
Lau hilabetetako lanak, trafiko aldaketarekin
Guztira lau hilabetetan luzatuko dira lanak. Bitartean, auto eta oinezkoen zirkulaziorako aldaketak egingo dira. Horretaz guztiaz informatzeko Udalak webgunean nondik norakoak eskegi ditu. Gainera, etxeetako postontzietara helaraziko dutela aipatu dute.
Lanen hasierarekin batera, asteazkenean, Zumalakarregi 23n errepidea moztuko dute. Kotxeak Virgen del Carmen kaletik bideratuko dituzte. Lanak Zumalakarregi eta Viña Vieja kaleen loturara bideratzean, ordea, trafikoa semaforo bidez kontrolatuko da. Berdin egingo dute Viña Vieja kalean.