Ramiro Gonzalez Arabako Ahaldun Nagusiak eta Natxo Urkixo Laudioko alkateak bilera egin dute gaur goizean.
Hitzorduaren ostean ordezkari politiko biek adierazpenak egin dituzte eta Ramiro Gonzalezek ziurtatu du Arabako Foru Aldundiko Gobernu Kontseiluak bihar onartuko duela Lamuza parkeko Musika Etxea birgaitzeko proiektua. 1.300.000 euroko inbertsioa suposatuko duela azaldu du Ahaldunak.
Kasinoa udazkenan
Gainera, Ramiro Gonzalezek erantsi du Kasinoa berreskuratzeko proiektua ere aurten onartu nahi dutela, udazkenean, alegia. Erabilerak oraindik zehaztu behar direla aipatu du Ahaldunak.
Harremanak normalizatu
Natxo Urkixok zein Ahaldun Nagusiak azpimarratu dute gaurko bilera harremanak normalizatzeko urratsa dela.
Laudioko alkateak nabarmendu du bilera gehiago egin behar direla elkarlanean jarraitzeko eta Ramiro Gonzalezek iragarri du bere helburua dela Gasteiz Laudiora hurbiltzea eta Laudio Gasteizera urreratzea. Horregatik bere lehenengo bileren artean hau deitu du Arabako Foru Aldundiak.
Enplegua
Ramiro Gonzalezek uste du garrantzia eman behar zaiola enpleguaren egoerari eta ildo hori landu behar dutela azaldu du.