Gaur 50 egun betetzen ditu JOAQUIN MARTINEZ ROJOk Gometeguiren lantegiaren aurrean autokarabanan bizitzen. Beraren eta maiatzaren amaieran kaleratuak izan ziren beste zazpi langileen ber-onartzea aldarrikatzen dago. Kaleratutako langileetatik seik kaleratze-akordioa sinatu dute enpresarekin. Iragan astean beste bi langileen (Joaquin eta Manuelen) ber-onartzerako akordioa lortu zuten enpresarekin, baina zuzendaritzak azken momentuan bertan behera utzi du akordioa.
Ber-onartzea mahai gainean zeneukaten, baina enpresak bertan behera utzi du akordioa.
Hala da. Iragan ostegunean eman zen akordioa, eguerdiko ordu batak aldera. Akordio hori bertan behera uztea eragin izan zuena (enpresaren esanetan) ohar baten filtrazioa izan da, egun horretan bertan El Correo egunkarian agertutakoa. Enpresak dio akordioa apurtzen duela filtrazio hori eman delako prentsan.
“El Correok argitaratutako oharra enpresatik filtratu dela uste dugu, eta aitzakia hori erabili du ber-onartzearen akordio bertan behera uzteko”
Baina ohar hori ezin izan da negoziazioan geundenengatik (langileak eta sindikatuak) filtratua izan. Guk uste dugu filtrazio hori enpresatik etorri dela, informazio hori asteazkenerako heldu behar izan zelako El Correoren erredakziora, eta guk orduan ez genuen hurrengo egunean mahai gainean jarriko ziguten akordioaren berri. Enpresak ostegunean bertan planteatu zigun akordioa, eta ostiralean bertan sinatu nahi zuela adierazi zigun.
Gauzak hala, zein asmo duzue epe motz edo ertain bati begira? Autokarabanan jarraitzeko asmoa duzu?
Bai, hemen jarraituko dugu autokarabanarekin, ahal beste zarata egiteko asmoarekin. Noiz arte? Abuztuan enpresa ia guztiz itxi egiten da, eta kanpatuak gauden leku hau Laudioko Jaietako barraken jabeen karabanez betetzen da guztiz. Botako gintuzkete, beraz.
Horregatik, irailaren 1ean itzultzea da asmoa. Orduan ere barraken jabeek uste dut hemen jarraituko dutela, baina leku bat bilatzen saiatuko gara. Hori da asmoa.
Nola dauden gauzak? Apurtuta. Enpresak berak apurtu egin ditu abian zeuden negoziazioak. Eta gaur egun ia ez dago ezer eta ez da ezer jakinarazi. Herenegun gure abokatua enpresaren abokatuarekin mintzatu zen, baina soilik enpresak izan duen jokaera txarraren inguruan.
“Datorren uztailaren 20an hiru hilabete beteko dituzte enpresako langileek nominak kobratu gabe”
Kaleratzeez gain, nominak ez-ordaintzearen afera ere hor dago...
Hala da. Datorren uztailaren 20an hiru hilabete beteko dituzte enpresako langileek nominak kobratu gabe. Esan didatenaren arabera, badaude ez-ordaintzeagatik salaketa jartzeko prest dauden langileak. Zer gertatuko den? Tailerrean dagoen jendearen araberakoa izango da. Oso larria izango litzateke onartzea hiru nomina izatea ordaindu gabe. Enpresa batzordea ostiralean bilduko da eta bertan erabakiko dute zer egin uztailaren 20tik aurrera.
Baina hori barruko kontua da. Ni hemen kanpoan pankartaren bat edo beste jar dezaket, baina ondo egongo litzateke langileak atera eta denok hemen batzea.