Laudioko Txosna Batzordeak oharra bidali du Txosnagunearen leku aldaketa azaltzeko, aurten Aldain plazan kokatuko baitute, Zumalakarregi etorbideko aparkalekua uzteko.
Txosna Batzordeak azaldu du gune berria partaidetza areagotzeko tresna bilakatu nahi duela, adin-tarte eta gustu orok bere lekua izan dezaten. Horregatik jo dute Aldai Plazara; bertako karpak erraztuko baitie gune berriak sortzea, erosoagoak eta gazte eta helduentzako egitaraua osatzea ez ezik, umeentzako ekintzak ere antolatzea.
Eskaintza oparoa eta anitza
Txosnagunearen ikur nagusietako bat diren gaueko kontzertuekin jarraituko dute: Izerdi Gorria (txupinazo egunean), Gose (haurren egunean), Anestesia eta Skakeitan (kuadrillen egunean) edo Revolta Permanent (baserritar egunean).
Arratsalde lasaiak
Arratsaldeko ikuskizun lasaiagoetarako gune berria ere egongo da. Txosnan bertan tokiko produktuez egindako afaria jateko aukera emango dute eta besteak beste, Igor Arzuaga (atzoko gazteen egunean), Olatz Salvador (berakatz egunean) edo Josu Bergara (baserritar egunean) bakarlariak arituko dira.
Elkarteek ere bere egitaraua daukate txosnagunean: karaokea, haurrentzako gastronomia lehiaketa, paella txapelketa, gaztelu puzgarriak, herri zirkua…
Urrezko katxia 2015: SOS Laudioko Lamuza Parkea
Txosna Batzordeak Urrezko Katxia saria sortu zuen 2013an eta aurten SOS Laudioko Lamuza Parkea plataformak jasoko du.
Taldeak egindako ibilbidea goraipatu nahi dute horrela eta urtebete luzeko ibilbidean, ehunka pertsona elkartu eta hamaika ekintza egin dituztela nabarmendu dute.