Laudioko Udaleko Gobernu Batzarraren parte izango dira EAJ eta OMNIA, EH Bildurekin batera. Talde politiko bakoitzak bi ordezkari izango ditu batzar horretan. Hiru taldeen arteko akordio bat medio adostu da osakera hori.
OMNIA eta EAJk prentsa-ohar bateratua bidali dute akordio azaltzeko. Euren hitzetan, EH Bilduk “bakarrik eta gutxiengoan” gobernatzeak “herriaren gobernagarritasuna arriskuan” jartzen zuen. Hori dela eta, bi taldeek “konfiantzazko boto” bat eman nahi izan diote koalizio independentistaren udal-gobernu taldeari.
Hala ere, ohartarazi dute batzar horretan duten ordezkaritza edota konpetentziak aldatu egiten badira “legeak eskaintzen dituen bide guztiak” erabilitako dituztela horiek berreskuratzeko.
Hainbat puntu, “gardentasunerantz eta parte hartzerantz”
Komunikabideei bidalitako prentsa-ohar horretan, bi talde politikoek “gardentasunaren eta parte hartzearen aldeko” hainbat neurri planteatu dituzte. Neurri horien bidez “talde politiko guztien arteko eztabaida” bat sustatu nahi dute, Udal Antolakuntzako araudia moldatzeari begira.
Honako neurri hauek planteatu dituzte horretarako:
*Udal-organo guztietan egindako akordioak argitaratu eta zabaltzea, Zuin aldizkariaren eta udalaren web-gunearen bidez.
*Udalak egindako obren adjudikazio, kontratu eta zerbitzu guztiak argitaratzea Zuin-en eta web-gunean, eta baita ematen diren diru-laguntza guztiak ere.
*Web-gunean argitaratzea udalean erregistratzen diren mozio guztiak, erregistratzen diren momentuan bertan. Mozio horiekiko egiten diren akordioak ere argitaratzea, egiten diren neurrian.
*Lan-batzordeen, Gobernu-batzordearen eta Osoko-bilkuraren aktak 48 orduko epean web-gunera igotzea.
*Udal-gobernuaren ekintzak kontrolatu eta jarraitzeko hiru Osoko-bilkura egitea urtero.
*Zinegotzi guztiei “euren lana ondo egiteko” behar dituzten dokumentu guztiak eskuratzeko erraztasunak ematea.
*Informazioren digitalizazioa sustatzea, eskurgarriagoa izatea dakarten sistemak gailenduaz.
*Zinegotzien antolakuntza-parametroen eta ordainketa ekonomikoen estandarizazioa egitea (puntu honen inguruko informazio gehiago hemen koltsutatu daiteke).
*Aurrekontu Parte-hartzaileen mekanika ezartzea 2016ko aurrekontuetatik aurrera.
*Parte-hartze hiritarrerako protokolo bat sortu eta 2016ko maiatza baino lehen onartzea.