EH Bilduk udal antolaketa proposatuko du bihar 18:00 egingo den udalbatzan. Aurreko legealdiarekin alderatuta zenbait aldaketa eramango ditu eta alderdien adostasuna ezinbestekoa izango da.
Hasteko Tokiko Gobernu Batzarrari eskumen gehiago eman nahi dizkio EH Bilduk. Jon Ander Altube zinegotziak adierazi du horrela udal osoko bilkurak arintzeko aukera egongo litzatekeela.
Horretarako ordezkaritza anitza izan beharko luke Tokiko Gobernu Batzarrak. Neurriak bat egingo luke EH Bilduk aldarrikatzen duen ereduarekin, koalizioaren ustez. Hau da, gardentasunarekin, partaidetzarekin eta lidergo partekatuarekin.
Erabateko dedikazioak
EH Bilduk 3 ordezkarien erabateko dedikazioak ere proposatuko ditu; Natxo Urkixo alkatearentzat eta Jon Ander Altube eta Amets Meaza alkate ordeentzat, alegia. Natxo Urkixok bere irakasle postuan kobratzen zuena irabaziko luke eta alkate ordeek 1900 euro garbi.
Jon Ander Altubek azaldu du Laudioko udala kudeatzeko gutxienez 3 pertsona behar direla eta gogoratu du aurreko legealdian 2 erabateko dedikazio besterik ez zirela egon eta hirugarrena EH Bilduk ordaindu zuela aholkulari baten bitartez.
10 arlo
Udal ardurak 10 arlotan banatu nahi ditu EH Bilduk. Natxo Urkixok Alkatetza eta Euskara kudeatuko luke, Isabel Bovedak Gizarte Ongizate, Osasun eta Lankidetza, Iñigo Martinez Cerrillok Laudioko Udaleko Tokiko Garapen Agentzia eta Funtzio Publikoa eta Lan Harremanak, Amets Meazak Kultura, Kirola eta Jaiak, Ogasun eta Ondarea eta Hezkuntza, Berdintasuna eta Gazteria eta Jon Ander Altubek Obra, Zerbitzu eta Mantentze-Lanak eta Hirigintza eta Ingurugiroa.
Udal osoko bilkurak arratsaldez
Aurreko legealdian ez bezala, EH Bilduren asmoa udalbatzak arratsaldez egitea da herritarrek parte hartzeko aukerak izan dezaten.