EH Bilduko Natxo Urkixo hautatu dute alkate Laudioko Udal Osoko Bilkuraren osaketan, jendez betetako udalbatza aretoan.
Azken momentura arte ziurgabetasunez betetako bilkura izan da. PPko zinegotzi den Iñigo Pedruzok bere buruari eman dio botoa. PSE-EEko zinegotziak (Txaro Sarasua eta Maria Dolores Muriel), berriz, abstenitu egin dira.
OMNIAko kideek boza eman dutenean egon da tentsio gehien. Alderdi horretako zinegotzi den Alvaro Barriosek Juanma Ibarretxeri eman dio botoa, baina beste hiru zinegotzien botoa ezberdina izan da: Nerea Gonzalezek Natxo Urkixoren alde bozkatu du, Jakin Artarazek Txaro Sarasuaren alde eta Aitor Antxiak Iñigo Pedruzoren alde.
EAJ-PNVko zinegotziek Juanma Ibarretxeri eman diote euren botoa eta EH Bildukoek Urkixori. Gauzak hala, alderdi batek gehiengo absolutua lortu ez duenez zerrendaburu bozkatuena atera da alkate.
Elkarlanean aritzeko deia
PPko zinegotziak Urkixo zoriondu eta herria aurrera ateratzearen garrantzia azpimarratu du. PSE-EEko Txaro Sarasuak, bere aldetik, esan du bere alderdiak Laudioko herriaren alde konprometitu eta lan egingo duela agintaldi osoan.
OMNIAren zinegotzia den Alvaro Barriosek bere alderdiaren bozaren zergatia azaldu du: "Egin genuen proposamenarekin koherenteak izan gara eta horregatik banatu dugu gure botoa beste alderdi guztien artean, herria talde guztien artean eraiki behar delako, aldebakartasunetik egitea zaila izango baita". Alderdi guztien arteko kontzentrazio gobernu bat osatzea proposatu zien OMNIAk gainontzeko alderdiei, hauteskundeak izan eta gutxira.
EAJ-PNVko zerrendaburua izandako Juanma Ibarretxek Natxo Urkixo zoriondu eta elkarlanean aritzeko prestutasuna ere adierazi du. Bukatzeko Natxo Urkixok ere elkarlanaren garrantzia azpimarratu du, eta ziurtatu du alderdi guztiekin kontatuko duela herria aurrera eraman ahal izateko.