LAB sindikatua ez dago ados Gometegui enpresan langileek hartutako erabakiarekin. Pasa den astean gertatutako 8 kaleratzeen aurrean greba mugagabea deitu zuen Langile Batzordeak baina handik gutxira bertan behera geratu da deialdia.
LABek azaldu du ez duela ulertzen zuzendaritzarekin bilera egin ostean greba bertan behera uztea eta erabaki horrekin kaleratutako langileak baztertu direla adierazi du.
Zuzendaritzaren jarrera ere salatu du
Halaber, sindikatuak gogor salatu du Gometegui enpresako jokaera. LABek nabarmendu du duela hilabete gutxi akordioa sinatu zutela zuzendaritzak eta langileek. Horren harira, zuzendaritzak 2015 eta 2016 urteetan lanpostu guztiak bermatu behar zituen eta langileek soldata jaitsiera onartu.
Sindikatuak azpimarratu du zuzendaritzak ez duela akordioa bete.
Horretaz gain, sindikatuak gaineratu du erakundeei laguntzarik ez diela eskatu Gometeguik eta kaleratutako langileek egiten zuten lana kanpoko kontratuen bitartez egiten ari direla.
Polonia
Irailean hainbat mobilizazio egin zituzten Gometegui enpresako langileek, zuzendaritzak enplegua erregulatzeko espedientea aurkeztu baitzuen eta Poloniara bidali nahi zituen hainbat behargin.