Ostegunean goizeko seietan ekingo diote Gometeguiko langileek greba mugagabeari, iragan astean kaleratu zituzten zortzi langileen berronartzea eskatzeko. Langileetako bat akordio batera iritsi zen zuzendaritzarekin, baina beste zazpiek “ez konforme” sinatu zuten kaleratzea. Hala adierazi du kaleratutako langile horietako bat den Joaquin Martinez Borrajok. Kaleratzearen berri jaso bezain laster, autokarabana hartu eta lantegiaren parean jarri zen Martinez. Hor jarraitzen du, langileen berronartzea aldarrikatzen.
Batzordearen eta gerentearen arteko bilerak, fruiturik ez
Atzo eguerdian bildu ziren Gometeguiko gerentea eta Enpresa Batzordea, gerenteak hala eskatuta. Martinezek azaldu duenez, gerenteak lau langilerentzako “konponbide indibidualak” planteatu zituen bilera horretan, “baina inolako garantiarik eman gabe”.
Hortaz gain, kaleratutako langileak adierazi du gerenteak adierazi zuela ez zuela bilera gehiago egiteko asmorik, “nahiz eta Enpresa Batzordea horretarako prest agertu”. Gauzak hala, osteguneko greba deialdiak aurrera jarraitzen du.