Laudioko EH Bildu Udaleko bozeramaileak, Koldo Zabalak, Aretako Kultur Etxean lanak egingo direla azaldu du; lan horiek egiteko 50.000 euro inbertituko ditu Udalak. Kultur Etxea 1981ean erosi zuten Aretako zenbait auzokidek eta auzolanaren bitartez konpondu eta 1986an ireki zuten.
Kultur Etxearen kudeatzaile eta Udalaren arteko hitzarmena sinatuko dute; Gurutze Gorria edo Elizarekin egin den moduan.
Lanak auzokideek egingo dituzte Udalak emango duen diru laguntzekin. Eta besteak beste, hauek izango dira gauzatuko dituzten lanak: koadro elektrikoa eta teilatua hobetu, hegoaldeko fatxadan dagoen teilatu txikia konpondu, paretak margotu, Internet zerbitzua eskaintzeko bi ordenagailu eta kableak jarri, irisgarritasuna hobetu sarreran eta areto nagusian, eta komunak egokitu.
Udalaren ustez, Kultur Etxea sozialki oso errentagarria da; umeek jolasten dute barruan euria egiten duenean, ikastetxearekin elkarlanean aritzen da, auzokideek bilerak egiten dituzte, auzo batzarrak ere bertan gauzatzen dira, kontzertuak daude, tailerrak… izan ere, hainbat gauza eskaintzen dira bertan.