Maiatzaren hasieran ireki dute berriro Latiorro auzoa erdigunearekin lotzen duen tunela, baina bertan aurreikusitako obrak ez dituzte bukatu. Eguraldi kaskarraren ondorioz lanak atzeratu dira eta proiektuaren hainbat obra gauzatu behar dira oraindik.
Tunelaren apainketa
Lehenik eta behin tunela bera txukundu behar dute. Ez bakarrik barrutik, kanpoan harmaila batzuk jartzeko eskatu baitute auzokideek. Horrek, eserlekuak ez ezik, argitasun gehiago ere emango dio igarobideari.
Horrez gain, sarreran horniketa zerbitzuak egokitu ostean baldosak jartzeari ekingo diote.
Plazan egongo da kioskoa
Geltokiko plazan ere aldaketa nabarmenak egin behar dituzte. Alde batetik, irisgarritasuna bermatzeko eskailera zaharrak bota eta berriak eraikiko dituzte. Zentzu horretan mugikortasuna bermatzeko behar bereziak dituzten pertsonentzako aldapa instalatuko dute, igogailu batek eskaini dezakeen zerbitzua emateko.
Bestetik, Kioskoko kokapen berriak aldaketa deigarria eragingo du, ez da aurreko lekura itzuliko; etorkizunean plazan egongo baita.
Zubiko Kurajo, hurrengo xedea
Elorza Maisua kalean ere saneamenduaren aldetik hainbat lan egiten ari dira. Hala ere, Koldo Zabala zinegotziak azaldu du saneamendu arazo larrienak Zubiko Kurajo kalean ematen direla.
Hori dela eta onartzear dagoen Foru Plan berrian behar horiei heltzeko proposamena egingo diote Arabako Foru Aldundiari