Laudion gehiengo politiko abertzalea aldakorra da. Ezker abertzaleak eta EAJk izan dute urte luzez alkatetza -azken legealdietan EAren partaidetzarekin batekin zein bestearekin koalizioetan- eta gehienetan taldeetako baten ostean besteak hartu du gobernuaren ardura. Gure Aukera, EAJ, HB, EAJ birritan, EH, EAJ birritan berriro eta Bildu izan dira orain arte alkatetza gidatu duten alderdiAk.
Ondorioz, aldaketa soziologiko eta politiko handia gertatu ezean lehia EAJ eta EH Bilduren artean izango da oraingoan ere. Horretarako koalizio subiranistak Natxo Urkixo egungo alkatearen aldeko apustua egin du, bere eta gobernu taldearen kudeaketa egongo da beraz aztergai hautestontzietan.
EAJk aldiz, zinegotzi aritu den Juanma Ibarretxiri eman dio alkatetza berreskuratzeko ardura. Ibarretxe kultura eta jaien batzordean aritu da legealdi honetan lanean.
Gainerako alderdien pisua
Hauteskunde atarian jakin-mina sortzen duen taldea Omnia da. Alderdi independenteak kanpainan adierazi du taldearentzat erabakigarriak izango direla jasoko dituen emaitzak; jausi kuantitatibo eta kualitatiboa beharko dute bere proiektuak iraun dezan.
Gehiengo abertzalearen aurrean, estatu espainiarreko bi alderdi nagusiek (PPk eta PSE-EEk) eskualdean boza ugari galdu zituzten azken hauteskunde europarretan. Joera horretan sakondu edo gelditu egingo den ikusteke dago orain. Sozialistek Txaro Sarasuarengan jarri dute berriz ere euren konfiantza. Popularrek aldiz, aurpegi berriak ekarri dituzte zerrendara: alkategaia Iñigo Pedruzo izango delarik.