Laudioko EAJk prentsaurrekoa eskaini du goizean bere udal programa aurkezteko. Bertan 11 neurri edo ildo aipatu ditu Juanma Ibarretxe alkategaiak.
Hasteko hirigintza esparruan berrikuntzak egin nahi dituzte jeltzaleek oinezkoentzako espazioa zabalduz Aldai, Herriko plaza eta Alberto Acero plaza lotzeko.
Basaurbeko araztegiari ere bultzada eman nahi diote. Horri lotuta, URA erakundearekin elkarlanean aritzeko asmoa daukate Zubikoko eta Altzarrateko zubien arteko ubidea hobetzeko etxebizitzak eraitsi gabe.
Trafikoari dagokionez Ugarten biribilgunea eraikitzea, erdiguneko bideak ondo antolatzea eta Gardeako geltokiaren gainean dagoen zubia zabaltzea beharrezkoa dela uste dute jeltzaleek.
Industria eta enplegua
Industria sustatzeko lurzorua eskaini nahi diote enpresei, berriak etor daitezen eta daudenak joan ez daitezen. % 20ko langabezia tasa dago herrian eta oso larritzat jo du egoera Juanma Ibarretxek LIP, Kider eta Vicalde enpresen itxieren ondorioz.
Enplegua sortzeko beste erakundeekin hitzarmenak sinatu nahi ditu EAJk. Aldi berean, aholkulari orientatzailearen figura sortu eta enpresariek tokiko enplegu mahaian parte har dezaten nahi dute.
Kulturaren aldetik, Laudio Antzokia gauzatzeko akordioetara heltzeko prest dago alderdia.
Adinekoei begira San Roque nagusien egoitzako plazak eta erretiratuen kluba areagotu nahi dituzte.
Herri erakargarria egiteko, EAJk uste du garbiketa berezia eman behar dela kartelak eta pintadak kentzeko.
Etxebizitza premiei erantzuna emateko jeltzaleek proposatu dute OHZ eta zenbait zerga murriztea eta hobariak eskaintzea.
Kiroldegia eta liburutegia
Bukatzeko, aisialdia eta kultura aipatu dute, EAJren asmoa liburutegi berria eraikitzea, kiroldegia handitzea eta hutsik dauden udal higiezinak erabiltzea baita.
Programa osatzeko prozesua
Norberto Aldaiturriaga legebiltzarkideak azaldu du duela urtebete hasi zela EAJ bere programa osatzen. Horretarako herriko adituen zein elkarteetan dauden laudioarren laguntza izan dutela aipatu du.