Iragan ostiralean egindako ez-ohiko udalbatzan Aldaikorreka errekako errestaurazio eta naturalizazio lanen kontratazio espedientea onartu zuen Laudioko Udalak. Obra Lamuza inguruaren urbanizazioaren lehenengo fasearen parte da. Orain urte batzuk Arabako Foru Aldundiak sustatutako Lamuza parkeko plan bereziari dagokio urbanizazioa bera. Aldunditik 3 milioi euro inbertitzearen konpromisoa hartu bazuten ere, 2011n Javier De Andresen taldeak atzera egin zuen.
Udal gobernu taldeak errekaren errestaurazioa aurrera eraman ahal izateko Obra eta Zerbitzuen Foru Planaz baliatu behar izan zuen. Horren bidez, Arabako herriek 2012-2015 bitarte bi obretarako diru-laguntza eska diezaiokete AFAri. Laudioren kasuan, tren geltokia, tunela eta Elorza maisua kalean egiten ari den obrak betetzen du bi eskakizunen muga. Hori bukatu eta berehala hasiko dira errekaren konponketa lanak.
Aldaikorreka errekaren errestauraziorako 1.298.221 euroko aurrekontua egin dute. Udalak 240.000 euroko gastua hartuko du bere gain. OZFPren bidez 989.999 euroko ekarpena jasoko da. Faltan diren 125.695 euroak, aldiz, Obren Finantzaketarako Ez-ohiko Funtsak emango ditu.
Errestaurazioan saneamendu sistemaren erreforma integrala egingo da. Egun saneamendurako instalazioak errekaren azpitik pasatzen dira. Puntu desberdinetan hodiak hautsita daude, eta, ondorioz, ur zikinak irten eta errekara isurtzen dira. Ondorioz, usain txarra egoten da, bereziki udan, ur gutxien dagoen unean. Saneamendurako instalazio berriak ibai azpitik atera eta berarekiko paraleloan jarriko dira. Horretaz gain, ubidea pitzatuta dago. Hori dela eta, parkeko sarrerara sarri ez da urik heltzen. Obrekin arazo horri ere irtenbidea emango diote.
Etorkizunera begira jarri eta aipatutakoaz aparte, inguruko eraikin eta espazioen horniketa bermatuko da. Hala, Kasino nahiz kirol gunerako zerbitzu desberdinetarako instalakuntzak txertatuko dira.
Hilabeteetako prozesua eta gero, udalbatzan onartzearekin batera kontratazio lanari ekingo diote. Aste baten buruan buletin ofizialean publikatu eta enpresek 26 egun inguru izango dituzte eskaintzak egiteko. Ondoren informe teknikoak eratu eta hiru hilabetetan, gehienez, obra esleitu beharko dute. Aurreikuspenen arabera uda hasieran hasiko dira lanekin. Burutu ahal izateko 6 hilabeteko epea izango dute, abenduaren 31rarte. Udal gobernu taldetik, hala ere, lehenago bukatzea aurreikusten da.