Laudio EAJk hainbat zuzenketak prestatu ditu udal gobernu taldeak proposatutako zirriborroaren harira. Guztira 769.841,36 euroko aldaketak iradoki ditu.
Hasteko 60.000 euroko diru-saila bideratu nahi du enplegua sustatzeko, zehazki Nerbioi ibaiaren ertzeak garbitzeko Laudioko herritarrak kontratatuz. Merkataritzari ere bultzada emateko asmoz 40.000 euro erabiltzea planteatzen dute jeltzaleek.
639.841,36 euroko inbertsioa auzoetan
EAJren zuzenketa gehienak auzoko obretan zentratu dira, 639.841,36 eurotan alegia. Horrela Arrañoko Irisgarritasun Planaren III. Fasea gauzatzea -431.841,36 euro-, Zubiko Kuraxo kaleko saneamendua bukatzea -100.000 euro-, Hornidura Plazako komunak lekuz aldatzea -30.000 euro- Odeibarreko parkinga hobetzea -25.000 euro-, Santa Luziako apaiz-etxe zaharraren errehabilitazioa -30.000 euro- eta mantentze-lan orokorrak egitea -23.000 euro- proposatu du alderdiak.
Kirola eta kultura
Kirola eta kulturaren esparruan diru-laguntzak mantendu behar direla adierazi dute EAJtik. Eta horretaz gain San Martin zelaiko aldagelak hobetzeko eta egokitzeko lanen bigarren faserako diru kontu berezi bat sortzea beharrezkoa dela erantsi du EAJk.