ABIGAIL ORTIGÜELA USSIA (Laudio, 2000) 5. postuan geratu da pista estaliko atletismo txapelketan. Baina pista estalirik gabe prestatu da lasterketarako.
Bosgarren postua lortu zenuen iragan otsailaren 21ean pista estaliko modalitatean. Nolakoa da horrelako froga baterako prestatzea?
Bueno, guk Laudion ez dugu pista estalirik beraz pista irekian entrenatu behar dugu. Eguraldi txarra egiten badu ere entrenatzera irten beharra dago, nahiko deserosoa da euria egiten duenean baina moldatzen gara.
Baldintza klimatologikoez gain, entrenamendu saioak ere desberdinak dira pista itxian 60 metro korritzen dugun bitartean pista irekian 100 metroko lasterketak korritzen baititugu.
Astean 5-4 egunetan entrenatzen dugu, ordu eta erdiko iraupena duten entrenamendu saioak dira.
Nolako esperientzia izan da txapelketa?
Oso positiboa, oso pozik etorri naiz. Klubetik ni bakarrik joan nintzen, nire entrenatzailearekin batera, ni bainaiz pista estalian korrika egiten duen bakarra, gainontzekoek krosa egiten dute pista estaliko denboraldian.
Txapelketan, nire marka mantentzea lortu nuen eta hori oso positiboki baloratzen dut.
Entrenatzailearekin ere oso giro ona egon da, oso ondo pasatu dut.
Nola hasi zinen atletismoaren munduan?
2013. urtean hasi nintzen, oso erakargarri ikusten nuen kirol hau. Iaz oso marka onak lortu nituen Euskadiko txapelketan: 1. postua 80 metrotako kategorian eta 2. postua, aldiz, 150 metrotakoan.
Nolatan zara pista estalian korrika egiten duen klubeko bakarra?
Ni abiadura-lasterkaria naiz, klubeko gainontzeko kideek erresistentzia lantzen dute gehiago. Horregatik, lehen esan bezala, sasoi honetan nik pista estalian jarduten dute eta gainontzekoek krosean. Pista irekiko sasoian ordea denok egoten dugu pista irekian lasterka.
Aukeran zer nahiago duzu, pista estalia ala irekia?
Aukeran nahiago dut aire librean korrika egitea. Azpiegitura askoz handiagoa da pista estalian baino, gehiago gustatzen zait.
Orain pista estaliko sasoia bukatu dela eta pista irekiko sasoia hastear dagoela, ze erronka dituzu?
Pista irekian 300 metro eta 10 metroko kategorietan hartuko dut parte. Nire helburuetako bat Espainiako txapelketarako marka minimoa lortzea da, baina gehien bat, ondo pasatzea eta disfrutatzea da nire helburu nagusia. Euskadiko txapelketa ere tartean da, hor ere marka ona lortzea espero dut.