San Roke Musika Elkarteak larrialdiko mozioa aurkeztu du alderdiek Laudioko udalbatzan eztabaidatu dezaten. Aurkeztutako testuan Musika Bandak azaldu du azken 6 urteetan udalak egiten dion ekarpen ekonomikoa izoztuta dagoela eta horrek ahalegin handia suposatu diola.
Bestalde, Bandak adierazi du egun daukan egoitza -Gardean- entseguak egiteko zein klaseak emateko herriko erdigunetik oso urrun dagoela eta zaila egiten zaiola ikasleak erakartzea.
Hori dela eta musika elkarteak eskatu dio udalari egiten duen ekarpena 5000 eurotan handitzea hurrengo urtetan KPI gehitzeko. Orain jasotzen duen diru kopurua 80.000 eurokoa da.
Diru horren ordez Musika Bandak kontzertu gehiago emateko prest dago Laudioko jaietan.
Bandaren etorkizuna kolokan
Laudioko Musika Bandak aurkeztutako mozioan beste ekimen gehiago proposatu ditu bere iraunkortasuna bermatzeko -beste erakundeen babesa lortzea, bekak jasotzea, entitate pribatuen diru iturriak bilatzea...-. Bandaren ustez planteatzen dituen neurriak gutxieneko baldintzak dira eta horiek bete ezean ezin dute bermatu jarraituko dutenik.