Kontsumoko Udal bulegoak 576 kontsulta erantzun ditu 2014 urtean, kontsulten % 38k erreklamazio formal bat izan du ondorio.
Telefonia izan da kontsulta gehien eragin duen kontsumo arloa, guztira 199 kontsulta, batez ere sakelako telefonoei lotutakoak. Besteak beste, mezu laburrak jasotzeko izandako arazoak, errealitatearekin bat ez datozen kontratuak eta telefono linea eta bermeekin izandako arazoak salatu dituzte bulegoaren erabiltzaileek.
Beste kontsulta askok energia kontsumoarekin izan dute harremana, 84 kontsulta elektrizitatea edo gas kontsumoari lotutakoak izan dira. Kontratuen inguruko ezjakintasuna eta hornitzailea aldatu nahi izatekotan izandako arazoak dira gehien salatu direnak. Produktu elektronikoak, autoen erosketa eta konponketa eta banku eta aseguruek ere hainbat kontsulta eta erreklamazio eragin dituzte.
Kontsumoko Udal Bulegoan laudioarren kontsultak ez ezik, inguruko herrietakoak ere jaso dira: 431 kontsulta Laudiotik heldu dira, Amurrioarrek 62 utzi dituzte eta Orduñarrek, 31. Gainontzeko kontsultak Aiara, Artziniega, Okondo, Ugao eta Basauritik heldu dira.