Laudioko EAJk prentsaurrekoa eskaini du goizean Bilduri inbertsiorik ez egitea leporatzeko. Jeltzaleek esan dute 2013 ekitaldian, aurrekontuan aurreikusitako eta Udalbatzan adostutako inbertsioen %71 ez zela bete. 2014 ekitaldian, aurrekontuan aurreikusitako eta Udalbatzan adostutako %66 ez zen inbertitu haien ustez.
Era berean, EAJk adierazi du Bildurekin adostutako hainbat proiektu ez direla gauzatu “nekazal eta herri eremuen asfaltatzea, Ugarte plazako berriztatzea, enplegua suspertzeko politika aktiboak betetzea eta langabezian dauden gazteei bideratutako lanbide programak” hain zuzen.
Horretaz gain obra gehienak atzeratzea eta legealdiaren azken urtean egitea aurpegiratu diote jeltzaleek udal gobernu taldeari. Agerpenean aipatutako eduki osoa beheko eranskinean irakur daiteke.
Soberakinak
EAJren ustez manipulatuak daude Bilduk ematen dituen datuak soberakinen inguruan. Ziortza Sierrak esan du soberakinen datuak fikziozkoak direla. Zinegotziaren aburuz 4,2 milioi euro horietatik 1,7 milioi euro kendu behar dira 2014ko aurrekontutik konprometituta daudelako inbertsioak egiteko.
Mikel Lasaren agurra
Mikel Lasak hedabideak agurtu ditu eta azken 4 urteetan egindako lana eskertu die. Modu berean, EAJk herriko gobernagarritasuna bermatu duela erantsi du eta horregatik harro daudela azaldu du.