300 eserleku izango lituzke aretoak, eta 4.7 milioi euroko kostua suposatuko luke
Laudion erabilera anitzeko areto bat eraikitzeko proiektu berri bat aurkeztu du Laudioko Udal Gobernu Taldeak. Aldaikoerreka plazan dagoen orubean egongo litzateke aretoa. Bertan halako eraikin bat egitearen ideia duela urte batzuk atera zen, eta Udalak enpresa bati enkargatu zion orduan hori posiblea izango litzatekeen jakiteko ikerketa egitea, Koldo Zabala zinegotziak azaldu duenez.
Aretoa lur azpian egongo litzateke, eta 300 eserleku izango lituzke. Baina kontzertuetarako 210 eserleku kendu ahalko lirateke, orotara 400 pertsonentzako tokia utziaz.
Areto nagusiaz gain, eraikinak “ekoizpen artistikorako” zonalde bat ere izango luke, eta baita hainbat biltegi eta gela ere. Aretoaren kostua 4.7 milioi eurokoa izango litzatekeela aurreikusten du ikerketak, baina ikerketaren egileek azpimarratu dute zaila dela aurrekontu zehatz bat imajinatzea.
Proiektua gainontzeko talde politikoei aurkeztu diete, eta herritarrei aurkezteko bilera bat ere egin dute. Zabalak adierazi du beste taldeekin kontsentsu batera iritsi nahi dutela proiektua aurrera atera dadin.