Astelehenean bilera izan dute Javier de Andrés Arabako Ahaldun Nagusia, PPko zenbait ordezkari -Santiago Abascal eta Joseba Elejalde-, Arabako Foru Aldundiko arkitektoa eta SOS Laudioko Lamuza Parkea plataformak Laudioko Kultur Etxean.
Javier de Andrések parkeko musika-etxean bulegoak jartzeko asmoa berretsi du. Laudioarren kexen aurrean erantzun du bere ustez hori dela Foru Aldundiaren esku hartzea justifikatzeko modu bakarra gainerako udalen aurrean.
Bulegoak lehenengo solairuan egongo lirateke eta eraikinaren beste solairuek zehaztu gabeko erabilerak izango lituzkete. Ahalduna eta arkitektoak erakusketa gela aipatu dute, besteak beste, baina ezer zehatza proposatu gabe.
PPko ordezkari politikoak azaldu du proiektua hurrengo hilabeteetan garatuko dela uda hasieran esleitzeko.
3 milioi euroko eskaerari ezezko borobila
Javier de Andrések adierazi du oposizioak eta SOS Laudioko Lamuza Parkeak proposatutako Foru Arau aldaketari uko egingo diola.
Hau da, eskatutako 3 milioi euroak ez dira bideratuko parkera. Ahaldunak erantsi du 2015ean diru hori ez dela beharrezkoa lanei aurre egiteko.
Kasinoa
Kasinoan ere lanak egiteko beharra dagoela adierazi du Ahaldunak, baina ez du zehaztu ez datarik ez Foru Aldundiak dirurik jarriko duen.
Hurrengo bilera
SOS Laudioko Lamuza Parkea plataformako kideek martxoan egin nahi dute blera Javier de Andrésekin, bere hitzen jarraipena egiteko eta jakiteko dirua bideratuko den 2015ean Lamuza Parkera. Ahaldunak erabaki hori oposizioaren eskuetan dagoela esan du nahiz eta PPk proposamena egin duen.