ELAko bi militante zigortu ditu Bizkaiko Auzitegiak baldintzazko mehatxuak direla eta. Sindikatuaren eta akusazioaren arteko akordioaren ondorioa izan da epaia eta ELAk berretsi du konfiantza osoa duela zigortutako militanteengan.
Adostutako zigorra urte betekoa izan bada ere, modu horretan sindikalistek saihestu dute kartzelara joatea. Horretaz gain 6.000 euro ordaindu beharko diote Tomas Acha enpresako jabeei eta sufragio pasiboa galduko dute kondena irauten duen bitartean. Hau da, ezingo dira hauteskundeetara aurkeztu.
Tomas Acha enpresako gatazka
Epaiketa Laudion oihartzun handiko lan gatazka baten azkenengo atala izan da. Tomas Acha enpresan 2011n hasi ziren arazoak. Beharginek % 25eko murrizketa onartu zuten soldatan krisialdiari aurre egiteko. Gero, soldatak kobratzeko zailtasunak hasi ziren enpresan eta 3 hilabete dirurik jaso gabe eman ostean, 2012ko hasieran Tomas Acha enpresako langileek greba mugagabea abiatu zuten.
Zuzendaritzak kaleratzeekin erantzun zuen eta horrek lan gatazka zakartu zuen. Langileek mobilizazio eta salaketa publiko ugari antolatu zituzten.
Martxoaren 2an ELAko 4 militante atxilotu zituen Guardia Zibilak sindikatuak Basaurin duen egoitzan. Antza, sindikatuak akordio ekonomikoa lortu zuen enpresako zuzendariekin. Horren ondorioz enpresako jabeek 238.000 euro ordaindu behar zituzten langileekin zeuden zorrak kitatzeko eta gatazka bukatutzat emateko. Baina jabeak dirua ELAko egoitzan utzi zuenean Guardia Zibilarekin agertu zen eta 4 militante atxilotu zituen, estortsioa leporatuz.
Hilabete batzuk geroago akordiora heldu ziren langileak eta Tomas Achako jabeak.