LAB sindikatuak, prentsa ohar baten bitartez, bere balorazioa azaldu du iragan abenduan Laudioko udalbatzan aurkezturiko mozioari talde politiko ezberdinek emandako erantzunaren harira.
Mozio horretan, Udalak hainbat lan eta zerbitzu betetzeko azpikontratatutako enpresek bete beharreko zenbait klausula sozial biltzen ziren, besteak beste lanpostuak mantentzearen subrogazio, lan baldintzen eta soldaten bermeekin. Horretaz gain, enpresa hauek Hitzarmen Kolektiboak errespetatzearen eskaera jasotzen zen mozioan.
Mozioa udalbatzan bozkatu zenean Bilduk baino ez zuen aldeko bozka eman, EAJk kontra egin zuen eta PSOE, PP eta Omnia udal-taldeak, berriz, abstenitu ziren.
Horrek Bildu eta EAJren arteko berdinketa teknikoa suposatzen zuenez mozioa berriz ere bozkatzea erabaki zen. Bigarren bozkaketa horretan alkatearen, Bilduko Natxo Urkixoren, bozkak kalitatezko izaera izango zuen eta, ondorioz, proposamena aurrera atera ahal izango zen.
Hala ere, bigarren bozkaketa horretan, PPk abstentzioa kontra bozkagatik aldatu zuen eta proposamena ez zen aurrera atera, popularren eta jeltzaleen kontrako bozkaren ondorioz.
LABek PPren jarrerarekiko harridura handiegirik ez du adierazi, euren esanetan “guztiok dakigu nola defendatzen duten lan erreforma ezberdinak eta euren apostua lan mundua norbanatzeko”. Aldiz, gogor kritikatu du PSOE eta PNV udal-taldeen jarrera: “Harritu gaituena PNV eta PSOEko jarrera egunero agertzen baitira hedabidetan euren lehentasunak pertsonak eta beraien lan baldintzak direla esanez. Baina esaten dutena gauzatzeko pausoak emateko momentua iristen denean langileriaren eta lan baldintzen kontra agertzen dira, aldiz, enpresarien eta euren etekin ekonomikoen alde agertzen dira.”
Era berean, LABek adierazi du Omnia taldearen abstentzioaren aurrean: “Omniaren babes eza ere harritu gaitu. Ezkertiartzat jotzen den taldea, non bizilagunen eta hauen eskubideen babesle moduan azaltzen den, ez dira gai izan mozio honen alde agertzeko. Ez dira kapaz izan Laudiorako, enpresa pribatuen bitzartez, lanak egiten dituzten langileentzako baldintza eta eskubideak bermatzea.”
Sindikatu abertzaleak, bide batez, gogoratu du tankera berdineko mozioak bestelako zenbait instituziotan onartzea posible izan dela, Nafarroako Legebiltzarrean, Gipuzkoako Aldundian edota zenbait udaletan kasu. 2013an Laudioko udalbatzak aurtengoan atzera bota denaren antzeko mozio bat onartu zuen, baina bertan ez ziren azpikontratek bete beharreko neurri sozialak zehazten.