Otsailaren 8an, XIX. Laudio Ikastola krosa ospatuko da Laudioko Lamuza Parkean. Urtero bezala Laudio Ikastola Krosa helburu argi batekin dator, euskara eta kirola uztartzea. Aurtengo edizioa Arbako eskolarteko txapelketaren baitan burutuko den proba izango da eta 2001 eta 2006 urteen bitartean jaiotakoek izango dute bertan parte hartzeko aukera.
Goizeko 11:00etan emango zaio hasiera krosari. 2001 eta 2002 urteetan jaiotako emakumezko infantilak izango dira parte hartzen lehenak 2.000m-ko lasterketan, gizonezko infantilak 11:15etan hasiko dira 3.500m-ko zirkuitua osatuz. Alebinak izango dira hurrengoak, emakumezkoak 11:35etan eta gizonezkoak 11:45etan, hauek 1.500 eta 2.500 metroko zirkuitua osatu beharko dute hurrenez hurren. Benjaminak, 2005 eta 2006 urteetan jaioak, izango dira lehiatzen azkenak, emakumezkoak 12:00tan 1.000m-ko lasterketan eta gizonezkoak 12:10etan 1.500m-ko lasterketan. Lehen hezkuntzako 2. mailatik beherako ikasleek erakustaldi lasterketan parte hartzeko aukera izango dute eguerdi partean.
1997an izan zen Laudio Ikastola krosaren lehenengo edizioa. Ikastolako Eskolaz Kanpoko Ekintzen batzordetik sortu zen ideia, bereziki seme-alabak atletismoan zituzten gurasoengandik. Garia hartan atletismo froga guztiak Gasteiz aldean egiten ziren Etxaurren Ikastolak antolatzen zuen krosa salbu. Egoera horren aurrean, Laudioko atletismo taldeko entrenatzaile zen Edu Frutosekin jarri ziren kontaktuan Laudio Ikastola Krosa elkarlanean antolatzeko. Euskara eta kirola uztartzeko helburuaren baitan urte askotan Ikastolen elkarteak bultzatutako "Euskaraz bizi" dinamikaren barruan sartuta egon da krosa eta hainbat urtez "Euskaraz bizi krosa" izenpetu da.