Astelehenean egingo den udal osoko bilkuran bi mozio ezberdin aurkeztuko dituzte PSE-EE eta EAJ alde batetik eta Bilduk bestetik.
Bi mozioek herritarrek auzo batzarretan egindako iradokizunak izango dituzte ardatz. Azkenengo auzo batzarretan zenbait auzokidek proposatu zuten estalkiak jartzea herriko hainbat puntutan.
Horren harira, PSE-EE eta EAJren testuak azaltzen du Laudion dauden zenbait aisialdi eremu batzuk -umeentzako parkeak eta pertsona nagusientzako kirola egiteko tresnak dutenak- ez direla erabilgarriak urtearen zati handi batean eguraldiaren ondorioz.
Horri aurre egiteko, gune horietan estalkiak jartzeko eskatzen diote udal gobernu taldeari. Eta zehazki bi hilabeteko epea ematen diote Bilduri proposamen teknikoa eta ekonomikoa gauzatzeko.
Bilduk arloko batzordetan lan egiteko deialdia
Bilduk beste mozioa aurkeztuko du udal osoko bilkuran PSE-EE eta EAJren eskaeraren aurrean. Gaur egindako prentsaurrekoan Koldo Zabala zinegotziak leporatu die oposizioko taldeei mozio mota horiek hedabidetan agertzeko pentsatuta daudela.
Zabalak azaldu du auzo batzarretan jasotako proposamenak lantzeko esparru egokiena arloko batzordeak direla eta ez udalbatzak. Ideia hori jaso dute testuan.
Gainera, Bilduko mozioak herritarren partaidetza sustatzeko mekanismoak garatzen jarraitzeko konpromisoa adierazten du.