Euskal Herria Kirolak antolatutako lasterketa zortzigarren urtez egingo da urtarrileko azken igandean. Urtero lez, 10 km-ko ibilbidea izango du.
Aste gutxi falta dira eskualdeko 2015eko herri-lasterketen egutegiari hasiera emango dion hitzordurako: urtarrilaren 25ean jokatuko den Laudio Herria lasterketa. Zortzigarren edizioa beteko du horrenbestez Euskal Herria Kirolak eta Euskarri Kirol Elkarteak antolatutako probak, eta pentsatzekoa da orain arte parte-hartzean izandako arrakastari eutsiko diola.
Ibilbidea, ohi lez, 10 kilometrokoa izango da eta ez da aldaketarik egongo; nahikoa laua izango da beraz, marka ona egiteko egokia. Aldai plazatik abiatuko dira korrikalariak, eta berehala sartuko dira Zumalakarregi etorbidean Laudioko herrigunean bira labur bat egiteko, Baias, Nerbioi eta Karmen kaletik. Handik berriro sartuko dira etorbidean eta Gardearaino joango dira, Han errekaren beste aldera pasatuko dira eta Aretaraino jaitsiko dira, ondoren errepide nagusitik Laudiora itzultzeko. Helmuga Lamuza plazan egongo da.
Izena emateko epea abenduaren 14tik urtarrilaren 23ra arte izango da. Aurretiaz eman daiteke izena Laudioko Olympus kirol-dendan eta www.ehkirola.org eta www.herrikrossa.com webguneetan. Prezioa 13 eurokoa da, eta egunean bertan eginez gero 15 euro.