Vicalde enpresako langileek iragarri dute lantegia 2015eko hasieran itxiko dutela. Urtarrilaren 22an aterako litzateke Vicalde konkurtso-legetik baina urte amaieran hainbat langile kaleratuko ditu zuzendaritzak, geroago -zenbait lan bukatu bezain laster- guztiak botatzeko.
Eusko Jaurlaritza prest egon da 300.000 euroko ekarpena errazteko baina jabeak -Florencio Vivanco- ez ditu beste 300.000 euro gehiago inbertitu nahi izan konkutso-legetik ateratzeko asmoz, langile ordezkarien arabera.
30 langile inguru dauzka orain Vicaldek baina 50 baino gehiago izan ditu garai oparoagoetan.
Langileak etsituta
Langileek azaldu dute Vicalde konkurtso-legea gaindituz gero irauteko aukera handiak zituela: "konkurtso-administratzaileak iritzi bera zuen".
Presio handiko ontziak egin izan ditu Vicaldek enpresa handientzat (Campsa edo Petronor, besteak beste) eta beharginen ustez behin konkurtso-legea gailenduta eskaera gehiago iritsiko ziren.
50 urte baino gehiago
Vicalde 1966. urtean sortu zuten eta duela bost urte hasi ziren bere arazoak; hainbat enplegu-erregulazio espedienteak ezarri dituzte 2009. urtetik.