SOS Lamuza Parketa plataformak 2015eko aurrekontuetan Lamuza Parkerako diru-sailak jaso daitezen beharrezko neurriak har ditzatela eskatu die Arabako Biltzar Nagusietako talde guztie.
“Aurrekontuen eztabaidak hartu duen bidea ikusita, larritzen gaitu, beste behin ere, Laudioko interesak Foru Aldundian ematen den akordio faltaren biktima izatea”, azaldu du plataforma herritarrak banatu berri duen prentsa oharrean.
Izan ere iragan azaroaren 26an, PP salbu, Biltzar Nagusietako gainerako talde guztiek bat egin zuten Laudioko plataformak bultzatutako mozioarekin. Testuak 2011n parkearen konponketarako konprometitutako 3 milioi euroko diru-saila berreskuratzea eskatzen zion Arabako Foru Aldundiari, bai eta herriko udal ordezkariak eta gizarte eragileen ekarpenak aintzat hartuta Parkea Babestu eta Kontserbatzeko Plan Berezia ere eratu zezala.
“Nahiz eta mozioa loteslea ez izan, eskertzen diegu alderdi guztiei emandako babesa, baina aldi berean eskatzen diegu konpromiso hori aurrekontuen eztabaidan islatzea, parkea berreskuratzeko finantzazio iturria bertan konpondu behar da eta”, azpimarratu du SOS Lamuza Parkea plataformak.