IRATXE LARRAZABAL (Laudio, 1977) ogia saltzen du Laudioko ostegunetako azokan. Datorren larunbatean tokiko ekoizleek azoka berri bat egingo dute, kontsumitzaile berriak bilatzeko asmoz.
Zertan datza larunbateko ekimena?
Hilabetero egingo da, hilabete bakoitzeko bigarren larunbatean. Ostegunetan jende nagusia bertaratzen da batit bat. Hala, merkatua jende gazteagoarengana zabaltzeko asmoz planteatu dugu ekimena. Ea jende gaztea tokiko ezkoizpenaren munduan sartzea lortzen dugun.
Zein da, bada, ostegunetan merkatura gerturatzen den jendearen profila?
Jende jubilatua da, gehienbat. Denbora duen jende jubilatua, paseo bat ematen duena eta bide batez erosketak egiten dituena. Gazteren bat edo beste ere etorri ohi da, baina gutxi.
Krisiak eragina izan du kontsumitzaileengan?
Bai, salmentetan batez ere. Ogia saltzen dut nik, eta lehen bazegoen bi edo hiru ogi hartzen zizkizun jendea. Orain, berriz, ogi-erdia hartu dezaketen galdetzen dizute.
Horri aurre egiteko ekimen gehiagoren beharra dagoela uste duzue?
Noski, nik baietz uste dut. Bestela hau geldi baino geldiago dago. Ezin duzu merkatal-gune handiekin lehiatu. Baina hemen saltzen duguna ia-ia aurreko egunean hartutakoa da, merkatal-guneetan dagoena hartu zenetik denbora bat pasata dagoen bitartean. Ez da gauza bera.
Zer esango zenieke tokiko produktuak garestiegiak direla diotenei?
Hemen saltzen diren ogietako batek lasai asko iraun dezake zortzi egun. Barrakoak, berriz, gaur erosiz gero seguru asko ez du bihar jateko balioko. Baina bakoitzaren gustuaren araberakoa da hori. Badago baita kontsumitzailearekin duzun konfiantza eta gertutasuna. Askotan datozen erosleei ogia erosteko dirua heltzen ez bazaie hurrengo astean ordaintzea uzten diegu. Hemen aukerak eman ditzakegu.
Ostegunetako ekoizle berberak egongo zarete larunbatean?
Nik uste baietz. Badago gazta ekoizle berri bat agian animatzen dena, baina bestela ez da aparteko aldaketarik egongo.
Bukatzeko, herritarrei zerbait helarazi nahiko bazenieke...
Ea larunbatean animatzen diren. Aukera polita izan daiteke paseo bat eman, kafe bat hartu eta, bide batez, erosketak egiteko.