Pasa den astean egondako atxiloketen inguruko irakurketa atera du Laudioko Gazte Asanbladak. Iragan azaroaren 26an Guardia Zibilak Suso Cela GRAPO taldeko preso ohia, Juan Manuel Olarieta abokatua eta Aitor Cuervo olerkaria atxilotu zituen (Galizian, Madrilen eta Errioxan, hurrenez hurren). Duela urte bat Laudioko Gaztetxean antolatutako Jardunaldi Antikapitalista batzuetan emandako hitzaldian “terrorismoa goratzea” egotzi zieten, eta Entzutegi Nazionaletik pasa ostean karguekin aske utzi zituzten.
Gazte Asanbladako kideek adierazi dute atxiloketa hori ez dela “kasu isolatu baten moduan” ulertu behar. “Azken aldian ugariak dira adierazpen askatasunaren kontrako sarekadak, iragan apirileko 'operación araña' kasu, non Laudioko gazte bat atxilotua izan zen”, adierazi dute asanbladako kideek, eta azpimarratu dute gazte laudioar hori “berriki absolbitua” izan dela.
“Era berean, aipatzekoa da Joneren kasua, zeini muntai polizial baten bidez kartzela zigorra ezarri dioten pankarta bat jartzea egotzita”, gaineratu dute Gazte Asanbladatik. Hori guztia dela eta, asanbladako kideek “elkartasuna” adierazi nahi izan diete “hiru atxilotuei, Joneri eta adierazpen askatasunaren aurkako sarekadetan atxilotua izan den orori”.