Laudioar baten etxebizitza enkantean atera behar zuten gaur Amurrioko Epaitegian baina bertan behera geratu da prozedura momentuz.
Epaitegiko iturriek azaldu dute etxebizitza babes ofizialekoa denez beste prozedura bat jarraitu behar duela eta ondorioz enkantea ez dute gauzatu.
Stop Kaleratzeak Arabaren balorazio positiboa
Etxebizitza galtzeko arriskuan dagoen herritarra Stop Kaleratzeak Araba plataformarekin dago harremanetan.
Plataforma pozik agertu da Amurrioko Epaitegiak hartutako neurriarekin. Horri esker Laboral Kutxarekin zorra negoziatu ahalko dutela uste baitute.
Kutxak “praktika onen kodea” abian jartzeko konpromisoa hartu du eta hori dela eta, Stop Kaleratzeak Arabak espero du zorra berregituratzeko aukera izatea.
Modu horretan Laudioko herritarrak zorra ordaintzeko gaitasuna izango duela uste dute plataformatik.
Konponbidearen bila
Laudioarrak hainbat aldiz jo du Gasteizko Laboral Kutxara bere arazoari konponbidea bilatzeko, baina Stop Kaleratzeak lagundu arte ez du konpromiso argirik lortu kutxaren aldetik.
Laboral Kutxak eskutitza bidali zion herritarrari otsailean horrek “praktika onen kodera” heltzeko, baina laudioarrak ez zuen mezua jaso eta kaleratze prozedura abian jarri zen.