Euskararen nazioarteko eguna dela eta EAJk euskararen aldeko mezua zabaldu nahi izan du. Jeltzaleek gizarteak egiten duen ahalegina goraipatu dute: “Milaka eta milaka dira, adibidez, helduan euskara ikasteko urratsa egiten dutenak. Nagusi dira, eta gero eta nagusiago, seme-alabentzat euskarazko irakaskuntza hautatzen duten gurasoak, askotan haiek euskara menderatzen ez dutelarik ere.”
Era berean euskal erakundeek egindako lana azpimarratu dute eta euskara erabiltzeko deia zabaldu dute.
Laudioko EAJk euskara egunerokotasunean erabiltzeko deia zabaldu du: “Gure alderdiaren izenean gizarte berdinkideago eta kohesionatuago baten aldeko politikagintzan ari garenok ezin baitugu inolaz ere euskararen aurrerabidean oztopo gertatu; ezin baitugu inolaz ere euskara sustatzearen aldeko politika baten predikatzaile huts izan, aldi berean euskal hiztun gisa ahal dugun guztietan jokatu ezean. Barkaezina litzateke aldarrikapen hutsaletan geratzea.”
Horretaz gain, alderdikerietatik at mantendu behar dela hizkuntza azaldu du EAJk: “ Denon artean, denok garelako ezinbestekoak euskara biziberritzeko ahaleginean. Ahalik eta adostasun zabalenean, horixe baita hizkuntza politika iraunkor edo sostenible baten giltza.”