Laudioko udalak .eus domeinua erabiliko du. Domeinua interneten euskal komunitatea azalarazteko eta elkartzeko egitasmoa da.
Hori gutxi balitz web-gunearen itxura, edukiak eta erabilgarritasuna aldatuko du. Atari berria abenduaren 31n egongo da sarean.
Gaur goizean azaldu du Koldo Zabala Bilduko zinegotziak errazagoa izango dela udalaren web-ataria erabiltzea eta hainbat informazio lortzea eskura jarriko dutela: azkenengo berriak -teknikariek txertatu ahalko dituztenak-, zinema, garraio publikoaren ordutegiak, Laudio 2025 plana, Zuin aldizkaria ere sarean irakurtzeko aukera...
Partaidetza
Herritarrekin harreman zuzena sustatzeko bi atal sortu dituzte. Alde batetik, iradokizunak bidaltzeko postontzi birtuala egongo da. Bere erabilera sinplea izango da eta herritarrek zerbait hobetu behar dela ustez gero, arazoaren argazkia eta testua helarazteko parada izango dute.
Gainera, kontsultak egiteko atala ere egin dute. Horrela, komunikazio arduradunak laudioarren kezkak bideratuko dizkiete udal teknikariei hauek erantzun ditzaten.
Horretaz gain, ordezkari politikoen informazioa argitaratuko dute: bere helbide elektronikoa besteak beste.
Tablet, sakelakoa, ordenagailua
Atari berria prestatuta egongo da teknologia ezberdinetan erabiltzeko, hau da, ordenagailuan, tabletean edo sakelakoan. QR kodeak ere sareratuko ditu.
Guztira, egin diren hobekuntzak 9.314 euro balioko dute eta web zerbitzuak kudeatzen dituen enpresak gauzatu ditu.