Arabako Biltzar Nagusietan ordezkaritza duten talde guztiek PP ezik babestu dute Lamuza Parkearen inguruko mozioa. Ezker Batua, PSE-EE, EH Bildu eta EAJk Arabako Foru Aldundiari eskatu diote 2011n konprometitu zituen 3 milioi euroak -gero atzera bota zituenak- berreskuratzea.
Diruaren helburua Lamuza Parkean beharrezkoak diren lanak gauzatzea izan beharko litzateke. Lan horiek neurri batean Laudioko Udala eta herritarrek erabaki behar dituzten erabilera soziokulturalak asetzeko balio behar dute, mozioaren arabera.
Lau alderdiek bat egin dute SOS Laudioko Lamuza Parkearen jardunarekin. Aldi berean, Lamuza Parkean lanak burutzeko behar den finantzazioa bermatzeko beharra azaldu dute.
Negoziazioak
SOS Laudioko Lamuza Parkeko kideak egon dira gaur Arabako Biltzar Nagusietan. Atzo bilera egin zuten PSE-EE eta EH Bildurekin eta alderdiek akordioa lortzeko jarrera azaldu zuten. EAJrekin bilera egingo du plataformak ostiralean.
Gaur goizean alderdi guztiekin mintzatu dira SOS Laudioko Lamuza Parkeko kideak babes zabalena lortzearren, baita Javier de Andresekin ere, hala ere, PPk ez dio bere babesa eskaini mozioari. Popularrek uste baitute parkearen egoeraren ardura udalarena dela.