Gaur goizean abiatu dituzte Maestro Elorza Kaleko saneamendua, tren geltokiko irisgarritasuna eta Latiorroko tunelaren zabalera -2 metrotik 7,5 metrotara- hobetuko dituzten lanak.
Momentuz hiru zuhaitz moztuko dituzte inguruak egokitzeko eta lehen faseari ekingo diote. Horretan saneamendu sareak hobetuko dituzte tren geltokiaren plazaren ingurutan. Horretan arituko dira abendua heldu arte. Kanalizazioak egin eta itxi beharko dituzte eta hurrengo fasetan Maestro Elorza eta Zubiko Kurajon gauza bera egingo dute.
Tunela urtarrilaren 8an itxiko dute
Latiorro auzoak 3.000 biztanle inguru ditu eta geltoki azpian igarotzen den tunela 2 metroko zabalera besterik ez du. 7,5 metroko zabalera handitzeko lanak urtarrilaren 8an hasiko dira eta litekeena da hiru hilabetez itxita egotea.
Egingo diren lehenengo lanak zerbitzuen kanalizazioan eragingo dute: gasa, telefonia, saneamendua...
Trenbideak moztuko dira
Tunelean egingo diren obren ekintzez ondorioz 4 eta 6 trenbideak moztuko dira otsailean. Hilabete horretan 1 eta 2 trenbideak erabiliko dira, baina martxoan kontrakoa gertatuko da; 1 eta 2 trenbideak ez dira erabiliko eta 4 eta 6 ordea bai.
Maestro Elorza kalean lanak
Maestro Elorza kalean urtarrilean abiatuko dituzte eta apirilean bukatzeko asmoa daukate. Hala ere, Koldo Zabala zinegotziak uste du luzatu daitekeela: “lan oso zailak baitira.”
Printzipioz trafikoan eragina izango dute lanek eta taxien aparkalekuak dauden errepidetik bideratuko da.
Atzerapenaren arrazoiak
Zentzu berean, Zabalak azaldu du zergatik atzeratu diren lanak. Eraikuntza esparruan indarrean dagoen hitzarmen kolektiboaren arabera, gabonetan etenaldia egongo litzateke. Latiorroko biztanleek data horietan eragozpen handirik sumatu ez dezaten -tunela itxita, finean- lanak atzeratu dituzte.
Eskerrak Arabako Foru Aldundiari
Bilerak egin dituzte Laudioko Udala, Vias y Construcciones enpresa, ADIF eta Arabako Foru Aldundiko teknikariak. Horietan adostu dute obren plana eta udalak bereziki eskertu du Aldundiaren jarrera.
Bilduk astelehenean egingo den Hirigintza Udal Batzordean azalduko ditu data eta lanen nondik norakoak.