Laudioko Udalak onartu ditu Arza eraikineko enpresa hazitegiko erabilera eta adjudikaziorako oinarriak. Foru Aldundiaren boletinean argitaratzen direnean (azaroaren 12-14ra aldera) irekiko da hazitegian izena emateko epea.
Honako baldintza hauek bete behar dituzte izena eman nahi duten enpresek: lokal propiorik ez izatea, 2 urte baino gutxiago izatea, ekonomikoki bideragarriak izatea, helbide fiskala Laudion izatea eta egiten duten jarduera zilegizkoa izatea. Hortaz gain, espazioak adjudikatzeko orduan hainbat irizpide erabiliko dira: enpresak sortutako lanpostu kopurua, bideragarritasun ekonomikoa eta enpresaren gaztetasuna. Hala ere, Iñigo Martinez Cerrillo zinegotziak azaldu du "itxaron-zerrenda" bat egongo dela, kanpoan geratzen diren enpresekin.
15 metro karratu bakoitzeko
9 enpresentzako espazioa dago hazitegian. 9 bulego, bakoitza 15 metro ingurukoa eta oinarrizko altzariekin hornituak guztiak. Hortaz gain, bilerak eta hitzaldiak egiteko gela komun bat, telefonoa eta argia ditu hazitegiak. Lehen urtean 12 euro ordaindu beharko dituzte enpresek metro karratu bakoitzeko, eta 15 bigarren urtean. Bi urterako adjudikazioa izango da.