Laudioko Udalbatzan hainbat gai landu dituzte astelehenean, LOMCE legea, merkatariza-ordutegia, Lamuza Parkea eta Kataluniako burujabetza prozesua besteak beste.
LOMCE legearen inguruko eztabaida jorratutako lehen mozioa izan da. Aiaraldeko Gure Hezkuntza Plataformak Laudio LOMCErik gabeko herria izendatzeko eskaera aurkeztu du.
Bildu eta Omniak babestu dute plataformaren ekimena baina PSE-EE, EAJ eta PPk aurka egin dute.
PSE-EE eta EAJk azaldu dute LOMCE legearen aurka daudela baina plataformak bere testuan jasotzen dituen zenbait ideiarekin ez daudela ados; intsumisioaren aldeko aldarriarekin, adibidez. Sozialista eta jeltzaleen ustez horrek ikasleen etorkizuna arriskuan jarri dezake eta.
Zentzu horretan EAJk beste mozioa aurkeztu du baina PP, Omnia eta Bilduk aurka bozkatu dute. Ondorioz, ez da LOMCE legearen aurkako moziorik onartu.
Merkataritza-ordutegia
Merkatari eta sindikatuek osatutako plataforma batek merkataritza-ordutegiaren liberalizazioaren aurkako mozioa aurkeztu du.
Eusko Jaurlaritzak izendatu ditu Bilboko zenbait auzo etorri turistiko handiko zonaldeak. Horren ondorioz jaiegunetan irekitzeko aukera daukate eta plataforma ez dago horrekin ados, neurriak merkatari txikien eskubideak urratuko dituelakoan.
Bildu eta Omniak aldeko boza eman dute eta gainerako alderdiak abstenitu dira, beraz testua onartu da.
Bildu eta EAJ Kataluniako prozesuaren alde
Bildu eta EAJk Kataluniako burujabetza prozesuaren aldeko testua eraman dute udalbatzara. Kataluniarren erabakitzearen eskubidea babestu nahi izan dute horrekin. Omniak ere aldeko boza eman du eta PP eta PSE-EEk aurka egin dute. Mozioak aurrera egin du.
Lamuza Parkearen aldeko konpromiso ekonomikoak
EAJ, Bildu eta PSE-EEk Arabako Foru Aldundiari Lamuza Parkearen harira konpromiso ekonomiko zehatzak eskatzeko testua adostu dute. Horretaz gain, Biltzar Nagusietan dauden taldeen laguntza ere eskatu dute.
Omniak ekimena babesteko asmoa izan du, baina Nerea Gonzalez zinegotziak udalbatza utzi du Mikel Lasa EAJko bozeramailearekin izandako eztabaidaren ostean. Hori dela eta ez du bozketan parte hartu.
Dena den, EAJ, PSE-EE eta Bilduren bozei esker onartu da mozioa. PPk aurka bozkatu du.
Paula Cuesta zinegotzi popularrak adierazi du Arabako Foru Aldundiak 2015-2016 urteetan 1.998.000 euro gastatuko dituela Lamuza Parkean.