Udalaren ekimen guztietan ikuspegi gaztea txertatzeko tresna da Gazte Plana. Bere helburuak, gazteei zuzendutako jarduera guztiak koordinatzea eta gazteen beharrak ezagutzeko eta hauei erantzuteko balidabideak maximizatzea dira. Plana osatzeko prozesuaren erdigunean gazteak izan dira, Udalaren ustez gazte politika erabakitzeko orduan zeresan handia baidute.
2013 urtean hasi ziren plana osatzeko lanak. Metodologiari garrantzi handia eman zaio, oso prozesu parte-hartzeailea izanik. Hiru fase egon dira, diagnostikoa, proposamenen fasea eta azkenik, ildonagusiak zehazteko fasea.
Ildo nagusiak gai bakoitzean
Planan jorratu diren gaiak hurrengoak izan dira: hezkuntza, enplegua, etxebizitza, osasuna, gizarte ekintza, kultura, aisia, kontsumoa, higikortasun jasangarria eta Udala.
Hezkuntza arloan, ikasteko leku berriak sortzea, ikastaro eskaintza zabaltzea eta dauden behar eta borondateetan oinarritzea dira zehaztutako proposamenak.
Enpleguari dagokionez, hurrengoak nabarmendu dira: gazteentzako lan eskaintzari zuzendutako politikak abiaraztea, beka eta laguntzei buruzko informazioa zabaltzea eta lan poltsen informazioa gazteentzako eskuragarri jartzea.
Etxebizitzaren gaian, Bizigune alokairu programa indartzea eta alokairua konpartitzeko poltsa sortzea dira ikusi diren lehentasunak.
Osasunaren arloan, osasuna jorratzeko proiektua martxan jartzeko beharra jaso da alde batetik eta baita sexu aholkularitza bulego fisiko zein birtual bidez eskaintzeko beharra ere.
Gizarte ekintzaren gaian, genero berdintasuna, sexu identitatea, immigrazioa eta egoera politikoa eta kulturala jorratu dira gazte plana osatzeko orduan. Ondorio nagusiak hurrengoak izan dira: herriko gune ilunak identifikatzea eta arriskua minimizatzeko bitartekoak jartzea, sexu indentitatearekin lotutako aurreiritziak lantzea eta etorri berriekiko eta kultura aniztasunarekiko sentsibilitatea sustatzea.
Kulturaren baitan, kulturaz, euskaraz, partehartzeaz eta asoziazionismoaz aritu izan dira Gazte Planan. Kultura – espazio berria sortzea, gazte elkarteak eta Udalaren arteko harremana eta koordinazioa indartzea eta elkarteek bete beharreko burokrazioa arintzea eta erraztea proposatu da.
Aisiari dagokionez, eskaintza zabalagoa sortzea, kirol eskaintzari buruz hausnartzea, kirol azpiegiturak hobetzea eta informazioa modu elektronikoan zabaltzeko bide berriak sortzea jaso dira.
Kontsumoaren arloan, droga kontsumoari buruzko informazio gehiago jasotzeko beharra jaso da, bulego fisiko edo birtualen bidez .
Higikortasun jasangarriaren gaian, bidegorri gehiago jartzea eta daudenak txukuntzea, gune ilunak hobetzea eta herria zailtasun fisikoak dituzten pertsonei egokitzea proposatu da.
Udalarekin zuzenean lotutako gaiei dagokionez, burokrazia gutxitzea eta gazte elkartekiko harremana zuzenagoa bihurtzea dira finkatutako helburuak. Gazte elkarteek zein Udalak antolatutako jardueren inguruan informazio gehiago zabaltzea eta gazteek proposatuako ekimenak abiarazteko bitartekoak jartzea, ere bai.
Hurrengo urratsa: lau urterako kronograma
Orain, ekimen hauek guztiak 2014 urtetik 2017 urtera joango den kronograma batean kokatuko ditu Udalak, gai bakoitzean duen ahalmenaren arabera epe motzerako edo luzeagorako planifikatuz.