Laudioko jaien data aldatzeko ordua heldu dela pentsatzen dute zenbait talde antolatzailek. Edo behintzat aztertzeko garaia. Horretarako bilera deituko du Udalak Jaien Batzarrera hurbiltzen diren elkarte, talde eta pertsonek parte hartu dezaten.
Fontso Larrazabal zinegotziak adierazi du oraindik ez dutela data zehaztu baina eztabaida emango dela aurreratu du. “Ez da udalaren ideia izan. Jaien balorazioa egiteko bileran aurtengo emaitzak oso positiboak izan direla eta jende asko hurbildu dela aipatu zuten hainbat taldek. Eta gehienek ondorioztatu zuten ez zela egon aurreko urteetan baino antolakuntza eta eskaintza askoz hobea. Ezberdintasun garrantzitsuena Bilboko Jaien data aldaketa izan da” azaldu du zinegotziak.
Hori dela eta eztabaida gauzatzeko interesa duten elkarte eta taldeen arteko hitzordua antolatuko du udalak. Jaien Batzarrean ekarpenak egiten dituztenek gonbidapena jasoko dute. Larrazabalek argitu du Udalak ez duela asmorik eztabaidan parte hartzeko, baina eztabaida ahalbidetu nahi duela.
Laudioko jaien daten inguruan zalantzak adierazi dituzte batzuek azken hilabeteetan. Aiaraldea Egunkariak argitaratutako zutabean Txema Urkijok idatzi zuen: “Zaindariaren jaien behin-behinekotasunaren zentzua urtu egin da. Horrekin batera, gure egutegi bereziak arazoak sortzen ditu antolakuntzan zein jaien kontzeptuaren ulerkeran. Luzeegia lehen, zatitua orain... eztabaida berdina da urtero.”
Laudioko EAJk ere jakinarazi zuen eztabaida hori ez duela saihestuko “beti ere modu lasaiean, eraikitzailean, inposaketarik gabe eta pertsona zein gizarte kolektiboen parte hartze zabalarekin egiten baldin bada”.