Laudioko Udaleko Gizarte, Ongizate eta Lankidetza arloak jarduera fisiko egokituen programa berritu du 2014/2015 ikasturterako. Zuzenak fundazioa arduratuko da zerbitzua emateaz 56.333 eurotako aurrekontuarekin.
Hiru eskaintza ezberdin biltzen ditu programak: desgaitasun fisikoak, fibromialgia edo neke kroniko sindromea dutenentzako gimnastika egokitu taldeak, igeriketa programatan aritzeko desgaitasunak dituzten adin txikikoei erantzuteko programa eta, azkenik, esklerosi anizkoitza eta alboko esklerosi amiotrofikoa duten pertsonei igeriketan aritzea ahalbidetzen dien programa.
Izena emateko baldintzak
Programatan parte hartzeko baldintzei dagokienez, gimnastika egokituan parte hartzeko Arabako Gizarte Ongizaterako Erakundearen mugikortasun baremoak emandako zazpi puntu izan behar dituzte interesdunek, fibromialgia eta neke kroniko sindromedunek berriz diagnostikoa egiaztatu beharko dute. Adin txikikoen kasuan 6 eta 16 urte bitartekoak izan beharko dira eta gutxienez %45eko desgaitasun fisiko, psikiko edo sentsoriala izan beharko dute. Esklerosi kausetan azkenik diagnostikoa eta %65eko desgaitasuna egiaztatu beharko dute.
1998an lehen gimnastika egokitu programa abiatu zuenetik herriko kolektibo ezberdinen beharrei erantzuteko ekintzekin osatuz joan da programa, fibromialgia eta neke kroniko sindromea 2005ean, desgaitasun fisiko, psikiko edo sentsorialik duten adin txikikoen arreta 2006an eta esklerosi anizkoitza eta alboko amiotrofikoa duten pertsonena 2013an.