Espainiar ikurraren auzia presente egon zen atzoko (astelehena) Laudioko Udal Osoko bilkuran. Administrazioarekiko auzi-prozesu epaitegiak espainiar ikurra udaletxeko balkoian jartzeko agindu zion Natxo Urkixo alkateari (orain arte udaletxeko teilatuan egon da jarrita, ikurriñarekin batera).
Hori salatzeko bando bat atera zuen udal-gobernuak, eta bando horren kostuaren inguruan galdetu zuen PSE-EEko Txaro Sarasua zinegotziak. EAJko Mikel Lasak, bere aldetik, auzia “erabili” izana egotzi zion Bilduren gobernu taldeari. Aurreko lege-agintaldian EAJren gobernuari espainiar ikurra teilatuan jartzeagatik “espainiar” deitu ziotela ekarri zuen gogora Lasak. Hala, “koherentziaz” jokatzeko eskatu zion Bilduri.
Bilduk, bere aldetik, auzia erabili izana ukatu zuen, eta gogorarazi zuen epaitegiak zuzenean eskatzen ziola alkateari espainiar ikurra balkoian jartzeko, isun baten mehatxupean. Bandoaren kostuaren harira, berriz, Natxo Urkixok adierazi du "bandoaren fotokopietan" datzala kostu hori, eta gero banaketa udalak jada kontratatuak dituen zerbitzuen bidez gauzatzen dela.
Ehundaka pertsona ikurriñari babesa ematen
Larunbat eguerdian 200dik gora herritar bildu ziren Herriko Plazan epailearen aginduaren aurka. Udaletxeko balkoitik ikurriña erraldoi bat eskegi zuten eta inguruan jarri ziren argazki bat egiteko.