Gometeguiko zuzendaritzak enplegua erregulatzeko espedientea formalki aurkeztu die langileei, eta hauek azaldu dute hasierako baldintzak baino okerragoak direla espedientean jasotakoak.
Horrela, Polonian aritu beharko diren pertsonek hurrengo plusak izango dituzte: hilero 150 euro lekuz aldatzeagatik eta 125 euro dieta gisa.
Horretaz gainera enpresa urtero etxera hurbiltzeko bi bidaia ordaintzeko prest dago. Langileen ordezkariek adierazi dute hasiera batean 4 bidaia ordaintzeko eskaintza egin zuela enpresak. Aipatutako baldintzak bi urtez egongo lirateke indarrean eta horren ostean urtero negoziatuko lirateke.
Bestalde, zuzendaritzak Polonian lan egiteko 30 langile hautatu ditu dagoeneko eta zerrenda helarazi dio enpresa batzordeari.
Hala ere, zuzendaritzak ez du ofizialki momentuz espedientea erregistratu administrazioan eta ondorioz langile ordezkariek ez dute ezer negoziatuko hori egin arte. Haien susmoa baita Poloniako afera kaleratze merkeak lortzeko modua dela. Bitartean lanuzteekin jarraituko dute langileek.