Urriaren 4a. Hori da Laudioko OMNIA udal-talde politikoak hautatu duen data datozen hauteskundeetan zerrendaburu nor aurkeztuko duen erabakitzeko. 11:00etan izango da zita, Kultur Etxeko Arraño aretoan eta parte hartzea laudioar orori zabaldua dagoela azaldu dute talde politikoko kideek. Asanblada horretan OMNIAk orain arte egindako ibilbidea errepasatu eta etorkizunera begirako ildoak zehaztuko dituzte.
Gaur ere, asanblada
Urriaren 4koa ez da izango OMNIAk deituko duen asanblada bakarra. Gaur (irailak 26) beste asanblada bat deitu baitute euren egoitzan (Lateorro auzoko Oketa 12n), 19:00etan. Urriaren 10ean, berriz, parte hartze plataforma aurkeztuko dute, 18:30etan. Plataforma hori nola erabili ikasi ahalko du bertaratzen denak.
Hizkuntza profilei buruzko hitzaldia, urriaren 3an
Hortaz gain, talde politikoko kideek hizkuntza profilei buruzko hitzaldi bat prestatu dute datorren urriaren 3rako. Hitzaldiaren lehen zatia euskal administrazioan egin den hizkuntza profilen erabileraren ingurukoa izango da, eta Joseba Arroitak eskainiko du. Bizkaiko Foru Aldundiko Laguntza Juridikoko Zerbitzuaren eta Tokiko Administrazioaren buru izandakoa da Arroita. Ondoren OMNIAko zinegotzia den Nerea Gonzalezek hartuko du hitza, herriko hizkuntza profilen problematikaren inguruan mintzatzeko. 18:30etan izango da zita.